الجمعة، 26 يوليو 2013

سلفني نافوخك وامشي حافي

عمو أمناضل , أونكل أمثقف , 
- هو مرسي صديق بيريز وامريكا الوفي ؟؟ واللا هو جاسوس لحماس ؟؟
- هو مرسي اتعزل علشان جاسوس وهربان من السجن ؟؟ واللا علشان مرضيش يسمع كلام السيسي ويعمل استفتاء؟؟ طيب إزاي السيسي كان بيحاول يقنع جاسوس إنه يعمل استفتاء ؟؟ طيب ازاي سابه طول سنتين كان المجلس العسكري بيحكم فيها وكان السيسي مدير المخابرات ؟؟
-هو أحنا لما نختلف في اي قضية بعد كده هنعد الناس في الشوارع ازاي ؟؟ طيب هو لو خالد يوسف ما صورهمش بالكاميرا من الهليكوبتر ؟؟ المظاهرة ممكن ربنا يتقبلها واللا تبقي باطلة ومتحسبش ؟؟ واللا لازم اتوضي ثاني واعيد المظاهرة وربنا يغفر لي .
طيب والست مرات اللي أغضبا ربنا فيهم وحطينا صوتنا في الصناديق ؟؟كفارتهم إيه ؟؟

-- هو الفريق السيسي كان بيسجل للجاسوس مرسي مكالماته وهروبه من السجن يوم  يناير الله اكبر يبقي علي كده بقي الفريق السيسي معاه تسجيلات المكالمات بين مبارك والعادلي وفتحي سرور مدبري موقعة الجمل اللي كانت بعدها بخمس ايام يوم
 فبراير وتسجيلات المتحف المصري اللي زي الشيكولاتة من الحر ساحت متعرفشي راحت فين ؟؟


الخميس، 25 يوليو 2013

أختيار الله لنا أفضل من اختيارنا لأنفسنا

اولا : منه لله اللي بقاله سنين  بيخلط مياه المجاري علي مياه الشرب
ثانيا : يا رب اللي خللي اصحابي بعد ما كان صوتهم عالي وبيشتموا حتي رئيس الدولة ودلوقتي بقوا خايفين يعلقوا عندي يا رب خلصهم من الخوف منه  ولا تجعل له سلطانا علي ولا عليهم  من اليوم الي يوم الدين
**واحد جاري نجار موقفني في الشارع  بيطلب مني أبص علي أشعات زوجته وأكتب لها علاج من عشمه , وأنا بكتبلها علاج متطوعا بدون اجر بيقولي بكره السيسي هيقتل  كل الجماعة الدقون الارهابيين دول ويخلصنا منهم , قلت له يا اسطي سيد طيب ما انتا شايفني ارهابي بتأتمني علي حياة مراتك ازاي ؟
** شاعر فاشل يساند سياسي كذاب واتكشف يدور في شوارع البلد بميكروفون يؤجره منافقي السيسي لينادي بأعلي صوت للميكروفون بصوت جعجاع كخوار البقرة " قوموا لتلبيلة النداء غدا للإحتشاد للقضاء علي الكفرة الإرهابيين تجار الدين ثم عندما يأتي لذكر سيده الظالم  ينخ صوته ويبقي حنين قوييييي .
فيكون رد الناس عليه بأن الناس تقوله مشي من الشارع بتاعنا ياقليل الأدب , يا اللا ياله متقرفناش , مين اللي كفار يا اللي عمرنا ماشفناك بتركعها اللي بيصلوا معانا ؟ واللا اللي بيساعدوا الفقرا , قل لنا كده اسم واحد بس من جيراننا المتدينين عمره مره بلطج علي واحد واللا مسك سلاح وهدد حد علشان يأخد منه حاجة. والبعيد بقي منظره أقل من اللباس المخروم .
 أذكركم جميعا أننا كنا دوما مختلفين لكننا توحدنا في ثورة 25 يناير توحدنا ضد الظالم ولنصرة المظلومين من القهر , فيا رب اللي قصد يفرقنا ويشتتنا ربنا ينتقم منه ويفضحه ويهزمه ويجعل بنهايته قبل أن يظلم أي شخص آخر.

يارب اللي عاوز يحكمنا بالخوف والسلاح والارهاب  يارب أجعله عبرة وفرجة الآن  للعالمين

يطلب الموت ولا يجده ويطلب الموت فلا يجده
يا رب انت الاعلم بالنوايا : اللهم من تعلم ان نيته أن يفرق بين المصريين  وأن يعيدنا الي عصور مبارك وعمر سليمان وأمن الدولة والقهر وتزوير الانتخابات وقمع الحريات والخوف  اللهم فلا تمكن له في ارضك علي الطيبين  ولا لدقيقة واحدة بعد اليوم ولا تجعله يذكر إلا باللعنات
ومن تعلم ان نيته هي الخير لمصر وأهلها الطيبين  والحرية لهم جميعا والأمان لهم جميعا  فيا رب وفقه وأنصر وارفع ذكره في الدنيا والآخرة
يا رب أنت الاعلم بالنوايا , وانت البصر بالقلوب  , وأنت القادر القاهر علي الجميع
استجب دعائنا في الخير , فأنت تعلم الخير لنا فأختر لنا ما هو افضل لنا
ههههههه خايفين كمان تقولوا آمين
طيب آآآآآآآآآآآآآآآآآآميييييييييييييييين

لَا تَحْسَبُوهُ شَرًّا لَكُمْ بَلْ هُوَ خَيْرٌ لَكُمْ 
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " لَزَوَالُ الدُّنْيَا جَمِيعًا أَهْوَنُ عِنْدَ اللَّهِ مِنْ دَمٍ يُسْفَكُ بِغَيْرِ حَقٍّ " .

الأربعاء، 24 يوليو 2013

لا تقتل باسمي ولا بمالي .


علي فكرة بقي انا مش مؤيد لمرسي لكن كل طلبي كان دولة حرة وارادة شعبية حقيقية لكن
الدعوة للتصادم الشعبي  مرفوضة شكلا وموضوعا
أي مجرم في دولة محترمة بياخد فرصته يدافع عن نفسه قدام نيابة محترمة وقضاء محترم , ومحاكمة عادلة وعلنية ويدافع عن نفسه يقول اللي هو عاوزه والاعلام ينقل المحاكمة بكل امانة , وليس من حق احد اصدار الاحكام بالارهاب وتنفيذ احكام الاعدام بكيفه ولا بمعرفته علي المواطنين لان ذلك عودة لقوانين الغابة .
الوحيد الذين رايتهم ساكتين وديوثين علي الدماء هم من ذهبوا ليأيدوا بشار المجرم في قتل شعبه
ايها الممثل : المتهم بريء حتي تثبت إدانته
عارف يا سيسي كان ممكن تحلها من اول يوم بالدعوة لاستفتاء أو لانتخابات فورا وتكون الحكومة التي تم تشكيلها حكومة انتقاليه لاجراء الانتخابات
تعرف لو حصل في مصر حرب اهلية بسبب دعواتك للنزول والصدام بين الشعب فلن يحمل الدم سوي من قام بتجنيب الوسائل السلمية بالصناديق  والانتخابات ودعي الناس للنزول الي الشوارع وقلب الدولة الي دولة شوارع , ونقيس الناس من الطيارات بالمتر 
عارف يا مواطن قبل ما تعطي تفويض لحد : قل لي الاول ما هو تعريف الإرهاب الذي تعطي تفويضا للحرب عليه ؟
جاوب الاول علي السؤال : هو مش المفروض فيه ليها رئيس مؤقت علي حسب كلامكم , مش المفروض الرئيس بتاعكم هو اللي يطلب التفويض .ولا هو فعلا
قل لي من من جيرانك واقاربك من الاخوان او السلفيين تعرف عنه انه ارهابي ؟؟ نعم من معارفك الشخصيين
طرطور ؟؟؟

رسالة ليك يا أبو ذقن طويلة

** مش أنت بذقن "#ملتحي" يعني ؟؟
خلاص مفيش كلام تبقي #إرهابي تحت اي ظرف
** تقعد ورا  #السيسي زي حزب #النور "اجتهادهم وهم احرار ويحاسبون عند الله " تبقي متطرف #متأسلم تاجر دين عميل لأمن الدولة وانتظر دورك في الصف للمنفاخ في عهد الحريات القادم .
** تقف ضد السيسي زي كل المطالبين بحق اصواتهم في #الانتخابات التي فاتت  تبقي ارهابي  والجيش يضرب عليك نار والشرطة تضرب خرطوش والبلطجية والمسجلين الشرفاء يخرطوك بالسيوف ويجب نزول الشعب لتأييد قتلك .
** طيب اقف مع ابو الفتوح طيب : يبقي انت إخوان متخفي وخروف مستخبي .
** طيب أقف  لوحدي ومش هعمل اي حاجة وآكل واشرب واعيش زي باقي الشعب  ؟؟ يبقي اي بلطجي هيعدي عليك بتوكتوك أو بسيف يسب لأهلك الدين ويلعن سلسفيل جدودك أو يشتم مراتك المنتقبة اللي ماشية في الشارع في حالها او أي أمين شرطة ينزلك في اي كمبن ويعاملك معاملة مهينة وباقي الركاب يقولك هو اكيد يستاهل دول ارهابيين أكيد عمل حاجة  .
** بس انا ياجماعة نزلت الثورة يوم 25 و28 يناير -
** لأ انتو بعتونا وقعدتم مع عمر سليمان وبعتونا في محمد محمود ومجلس الوزراء وماسبيرو
 بس انا يا جماعة كنت معاكم في محمد محمود ومجلس الوزراء  وكنا بنهتف هناك "يسقط يسقط حكم العسكر.
** يبقي انت عميل وعاوز تسقط جيش مصر الجيش الوحيد في المنطقة
يا جماعة دا انا كنت  بهتف ساعتها "يعيش الجيش يحميني ميحكمنيش "
يعني عاوز الجيش يحافظ علي احترامه من قلة ادب السياسة
زي ما انا عاوز رجال الدين يبعدوا بالظبط عن وساخات السياسة
و يا جماعة بالظبط زي الاسلام ليس الاخوان ولا مرسي وكذلك الجيش ليس مبارك ولم يكن طنطاوي ولن يكون السيسي .
** طيب احنا هننزل نؤيد ونفوض السيسي في حربه علي الارهاب ؟
والسيسي يطلب تفويض ليه؟ هو مش قيه مفترض رئيس جمهورية مؤقت ولا هو انقلاب عسكري الرئيس اللي بيقولوا عليه ده مالوش اي لازمة .
وبعدين شوفت عشرات الاسلحة والقنايل في التليفزيون , شفت معاها حد اتقبض عليه ؟
 ومين اللي قتل الناس عند الحرس الجمهوري وحاصر المصلين في مسجد الفتح برمسيس وقتل البنات في المنصورة ورجع يعمل افلام  وتفجيرات العادلي ثاني
ممكن بس حضرتك تقول لي علي اسم واحد بس إخواني او سلفي أو شيخ من قرايبك او من جيرانك اللي تعرفهم إرهابي او تعرف عنه انه بيشيل سلاح او سنجة او بيهدد الناس في حياتهم ؟؟عاوز اسم واحد بس
طيب لما انت متعرفش ولا اسم بتصدق إعلام المخابرات ليه

بس ياعم السيسي عاوز مصالحة  ؟؟
وهو اللي عاوز مصالحة يقتل ويلفق قضايا ويعمل اللي هو عمله.
 يا سيدي دا دعي لانتخابات باشراف دولي ؟
طيب وميعادها امتي ان شاء الله  ؟؟ مش هو راجل دقيق وكان بيحدد المهلة للريس بالساعة طيب محددش ليه ميعاد الانتخابات الجاية ,  واصلا الانتخابات اللي قبل كده كانت ايه مش كانت باشراف دولي وقضائي  ؟؟ وبعدين ايه لازمة 35 مليون واحد  يروحوا انتخابات ويقفوا في الحر والشمس مادام ممكن اي خمسة ستة مليون ينزلوا ويقف معاهم كام قناة تليفزيونية ومخرج  افلام ساخنة
وكام قناة  وييجي واحد لمجرد ان معاه دبابة ورشاش يلغي كل الانتخابات دي ويرمي اللي انتخبناه في الزباله أو يرميه في قفص الاتهام .

الخلاصة يا عم الشيخ ريح نفسك انت  متهم متهم عند الناس   فريح بالك خالص
قول الحق ومشي  , وحافظ بس انك ترضي ربنا وتحافظ علي دم أخواتك ولا تصطدم بهم  وسيب اللي يقول يقول , الدنيا مش آخر المطاف فيه آخرة وفيه حساب وفيه إله عادل عالم قوي لا يقف امام عدالته احد إلا وتم إنصافه


 ودي صورة للي ممكن ناشط سياسي يقوله عليك ويبرر قتلك ليسمح لضميره بالنوم



 

الثلاثاء، 23 يوليو 2013

ازاي تعرف إنك خروف؟؟

لما تلاقي  واحد  زي ده كان نايم قايم مع أولاد مبارك في شارع مصطفي محمود
بيقول أنه "....... " طيب أسمعه بنفسك أحسن





 ولما تشوف الصورة دي ايام مصطفي محمود وتعرف قد ايه الفنان طارق كان بيشجع ثورة يناير من اول يوم ومعتصم في التحرير  ومؤيد لمطالب ثورة  25 يناير من اول يوم

وتفضل تصدق كل اللي الاعلام بيقولك عليه  ان  فيه ارهابيين وفيه فنانين شرفاء ومواطنين يتصدرون للاسلاميين  وإن الاسلاميين بيقتلوا الناس وبيضربوا بالآلي والخرطوش
وإن كل الضحايا اللي بتموت مش نتيجة خيانة لأ نتيجة اشتباكات بين مؤيدين ومعارضين

يبقي سوري جدا  حضرتك أكيد خروووووووووووووووووووووووووف
فيا ريت مترميش فروتك علي حد وتتهمه إنه خروف إلا لما تجز أنت فروتك الأول
23 يوليو 2013






الاثنين، 22 يوليو 2013

بعد 61 سنة ما الذي تبقي من عبد الناصر ؟

اليوم في الذكري الحادية والستين ل23 يوليو1952
ما الذي تبقي من أي حسنة حققها عبد الناصر ؟
الكهرباء وبتقطع
والسد وهينشف
القناة ووقفوا تطويرها وحتي قبل ما يطهروها فلوسها مش لينا
الفلاحين ومنفوخين
المصانع واتباعت
العلاوة السنوية واتمنعت السنة دي 
السعي للوحدة العربية والاسلامية بقي تهمة  أمن دولة
عدم الخضوع لأمريكا واسرائيل بقت برادعي ووحدات أسرائيلية في سينا
التقارب المصري الفلسطيني  غزة بقت عدو مصر واسيرتها واسرائيل بقت صديقة
مساعدة حركات التحرر الوطني اصبحت مساندة للأنظمة القمعية لقمع شعوبها

الشعب اللي وقف جنب جيشه واستحمله برغم نكسته, النهاردة جيشه بيستحل دم اي متظاهر من الشعب يخالفه في الرأي
الحاجة الوحيدة اللي باقية من عهد عبد الناصر حتي اليوم وتعمل بكفاءة
هي مخابرات #صلاح_نصر وإعلام #لميس بنت #عبدالحميد_الحديدي الذي كان يكذب علي المصريين اثناء ضياع جيشنا في سناء ويقول اسقطنا 20 طيارة ودمرنا 500 دبابة .
يهني ثورة 23 يوليو نفسها محققتش أهدافها
وجايي تعملوا فيها مناضين وتكلموني عن ثورة 25 يناير
ولا جايين تعلموا فيها متمردين وتقولولي امتي؟




دستور سكسونيا 2013

نصت مقترحات المواطن محمد السكسوني  علي البنود التالية :
-مسموح فقط بالتظاهر والارادة الشعبية لمن هم علي مزاجنا .
- ممكن تتظاهر وتتقتل بالخرطوش ونقول عليك بلطجي إنما لو رديت علي اللي بيضربوك بالرصاص ,,,,, برضه هنقول عليك بلطجي .
-قياس راي الشعب بالمتر وليس بعدد الاصوات .
- جيش وشرطة سكسونيا يبذلان قصاري جهدهم للسهر علي حماية بيوت من يؤجرون البلطجية .
- الفيس بوك يمثل خطرا علي حكومة سكسونيا .
- مناضلي وعمائم سكسونيا يصمتون تماما اثناء قتل مواطني سكسونيا ويتكلمون عندما تتهدد عروش حكام سكسونيا العظماء .
-إعلام سكسونيا حر "يعني بيشغلوا التكييف علي السخن"  ونزيه "بيصرفوا علي مزاجه كويس"
يحظر تماما أي نشاط لجماعة "الإخوان المسلمين " المحظورة ويسمح فقط بنشاط جماعة "إخوان المسلماني " ويتم تغطيتها بالصوت الصورة .
- لابد للعاملين بإعلام سكسونيا من إجتياز الإختبارات التي تؤكد مبادءهم الراسخة إأن يكونوا من عائلات تبيع أعضاءها الجسمانية لتحسين الحالة المعيشية .
- الصورة من وكالة "ج.ح.ش " لأحد مواطني سكسونيا الشرفاء توضح أحلامه للمستقبل
عاش نضال الشعب السكسوني

السبت، 20 يوليو 2013

مبادرة لحل الأزمة المصرية 2013

dr-mohammad hegazy
#‏
مبادرة_المواطن_حجازي‬
‫#‏حق_الدم‬ ‫#‏حقن_الدم‬ ‫#‏لم_الشمل‬ ‫#‏مصر_جديدة‬
1- كل قادة مكتب الارشاد - وجبهة الانقاذ - والمجلس العسكري والدعوة السلفية يقدموا استقالاتهم ويعلنوا اعتذارهم للشعب و اعتزالهم للعمل السياسي تماما.
2- يعود الرئيس محمد مرسي لمنصبه لمدة 6 شهور يدعوا فيها لانتخابات رئاسية وبرلمانيةكاملة بعد تعديل الدستور باللجنة الحالية وتتم الانتخابات باشراف جهات موثوقة لجميع الأطراف ورقابة إعلامية مفتوحة بلا اي قيود .
3- تستمر الحكومة المعينة ولجنة تعديل الدستور كما هي وتعدل ما تراه وتضع قانون الانتخابات و هي فرصة لنطالع ونقيم آداءهم في التشريع وإدارة الوزارات ونري الفارق بينهم وبين آداء حكومة مرسي وليحكم الشعب عليهم ويقارن .
4- فور انتهاء اللجنة من تعديل الدستور ووضع قانون الانتخابات الرئاسية والبرلمانية يعرضان علي الشعب في استفتاء ولو تمت الموافقة عليه يفتح باب الترشح فورا .
5- كل شهيد قتل أو جرح يتم تخيير اولياء الدم بين قبول الدية الشرعية أو طريق القضاء والقصاص الشرعي .
6-اي إعلامي ثبت نقله لأكثر من ثلاث كذبات يتم شطبه من نقابة الصحفيين ويمنع من الظهور في القنوات مهما كان انتماؤه "إسلامي او فلولي او عسكري او غيره "
ملحوظة :- بإذن الله إذا نجحت هذه المبادرة الضربة ستكون موجعة لكل اعداء الوطن والمنتفعين وستتعرض المبادرة للهجوم الشديد لان كل الاطراف اللي امريكا واسرائيل والقوي العالمية متعودة تتفاوض معاها ستتغير فجاة مما سيقل موازينهم وأطراف المعادلة الجديدة لن تعمل حساب للخارج وحكوماته بل للشعب الذي اجبر قياداته السابقة علي الرحيل جميعها .
لو حضرتك موافق مش أقل من عشرة شير لو سمحت .
والصفحات دي بالأخص ياريت تهتموا
حركة أحرار | Ahrar Movement
حركة شباب صوت الميدان
6th of April Youth Movement - حركة شباب 6 إبريل
كلنا خالد سعيد
حازم صلاح أبو إسماعيل
مصر تستغيث بشبابها
حملة مصرنا لدعم أبو الفتوح رئيسا
الدعوة السلفية-الصفحة الرسمية
Egypt Presidential Spokesman . المتحدث الرسمى باسم الرئاسة المصرية
الصفحة الرسمية للمتحدث العسكري للقوات المسلحة
في الثانية والنصف فجر 12 رمضان 1434هـ 21 يوليو 2013

وصفة لعلاج الخوف والقلق

وصفة لعلاج الخوف والقلق |
كانوا بيخافوا يعلقوا عندي علي كلامي ايام مبارك و بيقابلوني في الاعياد ووسط السلامات يقولولي "خف شوية  " كرروا نفس الكلام ايام العسكري  , اليوم اجد منهم من يزايد علي
عارفين بقي بقول اللي في نفسي من غير قلق ازاي ؟ وعاوزكم تعملوا كده
لأني أرفع يدي مستسلما لمن قوته أعظم وأقول 85 مرة علي الأقل يوميا في صلاتي
قائلا :
"الـــــــــــلـــــــــــــــــــه أكــــــــــــــــــــــــــــــبــــــــــــــــــــــــــر "
قولها بقلبك وحسها هتفرق معاك كثيييير

الجمعة، 19 يوليو 2013

أسهل طريقة لإنفراج الازمة


#ديني_الاسلام #دستوري_القرآن #دستوركم_لا_يعنيني
إذا كانت مصر في أزمة وتريد الخروج منها فالشعب في ازمة والإخوان في أزمة والعسكر في أزمة والأحزاب في ازمة والثوار في أزمة والفلول في أزمة .
فإن كنا نريد لهذه الأزمة إنفراجا فأسهل طرق الفرج التي نتغافل عنها
هي : {‏‏وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ وَمَن يَتَوَكَّلْ عَلَى اللَّهِ فَهُوَ حَسْبُهُ } ‏[‏الطلاق‏:‏ 2- 3‏]‏
==== فالتوبة إلي الله من كل أخطاء الماضي , وتقوي الله في الخصومة مع الباقين فيما هو مقبل , والتوكل علي الله واتباع اوامره في التعامل مع الناس بالعدالة والانصاف بدون ظلم او بغي او كذب او تجاهل
الساعة الثانية ظهرالعاشر من رمضان 1434 هـ


الخميس، 18 يوليو 2013

هل تخاف من الظالم أم من المظلوم ؟

كان بنو إسرائيل بهم العبر من سوء الأخلاق ولكنهم كانو مظلومين ومضطهدين من فرعون قاتل غاشم استطاع ان يقنع شعبه بأن يقتل نصف اولادهم ويترك النصف والدليل الذي اقنعهم به هو حلم -آه والله حلم - حلمه فقتل بناء عليه آلاف الاطفال وطاوعه الشعب
والقصة التاريخية تقول أن هذا الفرعون طارد هؤلاء القوم حتي حوصروا بين جيشه من الخلف و البحر من الامام ,حتي أيقنوا بالهلاك ثم انشق البحر فنجا هؤلاء ولا يتوقف الفرعون ولا جيشه فيدخلوا البحر فينطبق عليهم , أما هؤلاء الذين نجاهم الله حالا فيعودون مرة اخري للاسف إلي سوء اخلاقهم وإخلافهم لوعودهم ومخالفتهم لأوامر ربهم بحجج عديدة.
والعبرة هنا :" لا تخف علي المظلوم من مرحلة الاستضعاف والمطاردة بل خف منه وعليه في مرحلة ما بعد البحر , من يتعلم الدرس ؟؟
#ديني_الإسلام #دستوري_القرآن #لا_اعترف_بدستوركم
الدكتور محمد حجازي
 فجر العاشر من رمضان 1434هـ -19 يوليو 2013

الأربعاء، 17 يوليو 2013

أنباء عن انتحار ضابط قناص مجزرة الحرس الجمهوري |غير مؤكد حتي الآن


تقدمت السيدة علياء محمد علي 26سنة زوجة النقيب سامح عدلي محمود من القوات المسلحة ببلاغ إلي قسم ثاني مدينة نصر تثبت فيه أنها استيقظت أمس الاثنين الساعة الرابعة فجراً على صوت إطلاق نار، قالت : ظنت أنه بالقرب من منزلنا بمساكن ضباط الحي العاشر، ولكنها فوجئت أن صوت الرصاص كان في منزلها حيث وجدت زوجها النقيب غارق في دمائه إثر طلق ناري في الرأس.
وحسبما ذكرت "الشروق نيوز" إن زوجته في حالة انهيار شديد قالت: إن زوجها يعمل في قوات الصاعقة بالقوات المسلحة، وأنه عاد إلي المنزل بعد غياب إسبوعين، وكان يخبرها دائما بالتليفون أنه في مهمة خاصة لخدمة الوطن.
أضافت أنه حين عودته ظهر الاثنين كان على غير عادته يرتدي الملابس المدنية، وليست بدلته العسكرية، مشيرة أنه كان في  حالة نفسية غريبة وتبدو عليه أعراض اكتئاب.
مؤكدة أنها لأول مرة تراه بهذه الحالة من الارتباك والتدخين، مع أنه رياضي وغير مدخن. قالت : حاولت أساله "مالك ماكنش بيرد عليا وبيقولي سيبيني دلوقتي وعندما كررت عليه السؤال أكثر من مرة نهرني، وكاد أن يضربني ، فتركته ، ووضعت له السحور ونمت حتي استيقظت لأجده في هذه الحالة".
ولم توجه السيدة علياء اتهاماً لأحد بقتله ، مشيرة : أنها وجدت سلاحه المسدس بجانبه، ولا أحد في المنزل، مؤكدة أنها بادرت بإبلاغ الشرطة التي وصلت سريعا، ومعها قوات الشرطة العسكرية التي تحفظت علي جثمانه وحملته إلى مستشفى المعادي العسكري لاستكمال إجراءات الدفن.


http://www.almesryoon.com/%D9%82%D8%B6%D8%A7%D9%8A%D8%A7-%D9%88%D8%AD%D9%88%D8%A7%D8%AF%D8%AB/192379-%D8%A3%D9%86%D8%A8%D8%A7%D8%A1-%D8%B9%D9%86-%D8%A7%D9%86%D8%AA%D8%AD%D8%A7%D8%B1-%D8%B6%D8%A7%D8%A8%D8%B7-%D9%82%D9%86%D8%A7%D8%B5-%D9%85%D8%AC%D8%B2%D8%B1%D8%A9-%D8%A7%D9%84%D8%AD%D8%B1%D8%B3-%D8%A7%D9%84%D8%AC%D9%85%D9%87%D9%88%D8%B1%D9%8A

الاثنين، 15 يوليو 2013

علشان أحترم نفسي


#‏عشان_بحترم_نفسي‬ أخوكم ضد الكيل بمكيالين ؟؟ :
- طبعا قطع الطريق حرام علي دول وعلي دول بس برده حرام تسمع دول لما ينزلوا يوم واحد , وتسيب دول في الشارع 18 يوم ويجيلك "طرش مفاجيء"
- قتل 104 واعتقل 1000 ومعروف ومصور من اطلق عليهم النار فلم يعمل مع حدهم حوار "وواحد * واحد * اتعور في صباعه منعرفش مين عوره كل القنوات بتتسابق علي عمل حوارات معاه .
- طبعا توقيف مصالح الناس في رابعة لمدة 15يوم حرام بس أكيد برضه توقيف مصالح المصريين في التحرير لمدة 15 شهر مش "كنافة بالكريمة "
- كنت ضد أتهام فتاة التحرير بمايسيء لعرضها وكتبت مقالات شديدة اللهجة ضد كل الحركات الاسلامية والمذيعين الذين مسوها بسوء , وايضا انا الآن بكل قوة ضد اي سافل يتهم شريفات مصر وسوريا في اعراضهن .
- نزلت ضد مبارك القاتل الذي قتل المصريين في التحرير , وكذلك نزلت مرارا ضد المجلس العسكري القاتل الذي قتل المصريين , وانتقدت محمد مرسي لضعف وفشل إدارته وسكوته علي من أعلم يقينا انهم مفسدون ومسببون لكل ما نعانيه من مشاكل , وكذلك لن اقف ساكتا بإذن الله علي اي مخالفات أو اخطاء امنية او سياسية يرتكبها المسؤلون الآن

دعاء للحائرين



أجمل حاجة في الدنيا

أجمل حاجة في الدنيا  واصعب حاجة في نفس ذات الوقت إنك تكون مستقل :
تلاقي الفلول وحزب الكنبة  بيتهمك أنك "هتخربوا البلد والاستقرار ...وتكملة النشيد"
وتلاقي النيو ديموقراطيين بيتهمك إنك إخوااااااااااااااان ومتطرف وتستحق الضرب بالرصاص الحي وعندك جرب , وبتظبط "نكاح متعة ".
وتلاقي الإخوان بيتهموك إنك"بلاك بلوك و أناركيين " وشباب متحمس مش فاهم حاجة
وتلاقي السلفيين بيقولوا عليك شاذ  عن الجماعة ولا تسمع كلام المشايخ
كل واحد من دول عاوز يصبك في قالب جاهز هو صنعه أو شربة ممن يصنعه له في #إعلام_المخابرات و #أحزاب_المخابرات
وتلاقي معظم الناس اللي بتشغل مخها من كل دول حتي ولو لم يملك جرأة الإعلان عن ذلك  بينه وبين نفسه بيحترمك وشايل ليك موقف او موقفين ساندته فيهم في حقه لما كان كل العالم ضده

#المباديء_لا_تتجزأ و #الحرية_قيمة_الحياة و #العدل_أساس_الملك

الأحد، 14 يوليو 2013

تحليل خطاب الفريق السيسي 14يوليو 2013


  • تحليل | ‫#‏خطاب_السيسي‬
    أحب بس افكرك أن مرسي كانت بداية محنته الحالية هو الاقتصار علي قاعات فيها أنصاره فقط , يصفقون لكل كلمة يقولها , ويستعين برجال دين يؤيدون موقفه بطريقة مبالغ فيها
    *** يلاحظ أنك مفوه ومركز وكلامك له نبرات عاطفية أكثر كثيرا من د. مرسي .
    *** يبدو انك يتم إعدادك للرئاسة بجد لكن للأسف انت استعجلت كثيرا.
    ***كثير مما تحدثت به عن الإقصاء واحترام حرية التعبير والارادة الشعبية وحق الشعوب في أختيار حكامها كذبته بكل صراحة اجراءاتك خلال الاسبوعين الماضيين .
    *** شربت كثير أنا قبل كده من خطابات حكام ومسؤلين ووزراء مصر ولا أعترف بغير لغة التنفيذ علي الأرض وما أمسكه بيدي .
    ***أنا كمحمد كفرت بأمريكا وديموقراطية أمريكا وآمنت بقدرة الله وعدله فقط وأي قوي سياسية سواء كانت إسلاميين او ليبراليين أو عسكريين تعتمد علي اعتراف امريكا لتحكمني هي عندي إلي زوال وهي والعدم سواء
    ***كل ما ادافع عنه حاليا هو حق الدم , وضد الاستبداد , والعدالة بين المواطنين ,وحقي في اختيار من يحكمني

تابعني علي فيس بوك


ليس أول خنزير يقولها

ده دلوقتي في يوليو 2013 


 مع عودة الاشاعات حول المعتصمين في رابعة لتكرر نفس الاكاذيب التي كان يكررها خنازير إعلام مبارك حول المعتصمين في التحرير اثناء ثورة 25 يناير 2011
نحب فقط أن نذكركم ببعض اقوال هؤلاء الخنازير يمكن يكون فيه ناس كانت مسافرة
او ناس كانت لسة متولدتش ايامها وماشافوش الكلام ده فحب نعرفهم قد إيه إعلامنا حقير حقير حقير  .... ولا يخجل أبدا من تكرار نفس الاكاذيب أمام شعب ينسي بسرعة جدا




https://www.youtube.com/watch?v=PgZ51KF2noY


ده كان في يناير 2011


أصحي يا شعب نايم

السبت، 8 يونيو 2013

المكتبة المسموعة لروائع التراث العربي

العديد من الأصدقاء يحبون القراءة ولكنهم لا يجدون الوقت الكافي , وجدت هذا الموقع الرائع الذي يقدم العديد من الكتب التراثية والعلمية الرائعة المقروءة والذي يمكنكم من خلاله الاستماع المباشر أو تحميل هذه الكتب ,, تمنياتي باستماع واستمتاع وخالص دعواتكم
المكتبة علي هذا الرابط
http://www.alukah.net/Audio_Books/